Shkup, 9 shkurt 2024 (MIA) – Ministri i Ekonomisë Kreshnik Bekteshi konsideron se duhet të rinegociohet me një nga katër investitorët strategjikë në fushën e energjetikës për të cilët, në përputhje me Ligjin për investime strategjike, Qeveria ka dorëzuar në Kuvend propozim ligje për realizimin e projekteve strategjike investuese, në procedurë të shkurtuar, të cilat tashmë kanë kaluar filtrin e parë parlamentar. Për të, siç thotë ai, është e diskutueshme të jepet ndihmë e drejtpërdrejtë shtetërore nga Qeveria për investime fitimprurëse dhe nëse është e nevojshme edhe në aspektin juridik formal, Ministria e Ekonomisë do të kërkojë kthimin e zgjidhjeve të caktuara në një procedurë qeveritare që do të negociohet nga fillimi.

"Kemi katër investime strategjike të dërguara nga Qeveria në Kuvend. Për njërin prej tyre, ne mendojmë se me investitorin potencial strategjik duhet të rinegociohet për gjëra të caktuara, duke marrë parasysh mendimet e institucioneve kompetente si Avokati i Shtetit, Komisioni për Mbrojtjen e Konkurrencës, ministritë e financave, transportit dhe lidhjeve, bujqësisë, mjedisit, EMV, MEPSO dhe institucionet e tjera që duhet të japin mendimin e tyre më tej. Nuk do të doja të emëroja kompaninë sepse mendoj se ishte e padrejtë që unë të emëroja një kompani të veçantë në konferencë për media", tha Bekteshi në përgjigje të pyetjes së gazetarëve në konferencën e sotme për media në Qeveri. 

Për njërin prej tyre, shtoi ai, do të kërkojmë sqarim plotësues.

"Në përputhje me Strategjinë e zhvillimit të energjetikës dhe rregulloret ligjore që dalin nga Ligji për energjetikë, ndërsa tashmë jemi në përgatitjen e një ligji të ri për burimet e ripërtërishme të energjisë, kemi urdhëresa dhe rregullore që përcaktojnë mënyrat për të mbështetur nxitjen e investimeve në fushën e burimeve të ripërtërishme të energjisë. Çfarë do të thotë kjo? Më parë kemi pasur mekanizma dhe masa në formë të tarifave “fiding” me çmim që është përcaktuar për një periudhë të caktuar, ndërsa tani i kemi ndryshuar, gjë që ka mundësuar që kompania jonë shtetërore në këtë rast EMV të jetë në gjendje të lidhë kontrata për blerjen e energjisë elektrike në përputhje me kriteret që janë në interes të EMV-së dhe në përputhje me dinamikën e prodhimit të energjisë elektrike nga EMV-ja. Dhe kjo nuk diskutohet për mua, sepse është në kuadër të negociatave që EMV bën përgjithësisht për nevojat e tyre, të cilat furnizojnë furnizuesin universal, dhe në të njëjtën kohë konsumatorët e vegjël. Për mua, do të ishte e diskutueshme ajo që dëgjojmë si nga ekspertët ashtu edhe nga analizat që bëjmë për investime të licencuara fitimprurëse, për të dhënë ndihmë të drejtpërdrejtë shtetërore nga Qeveria", thekson Bekteshi.

Mendoj, shtoi ai, se investime të tilla që tashmë kanë një lloj ndihme shtetërore – qofshin tarifat fiding ose marrëveshjet e blerjes së energjisë elektrike - tashmë po përdorin ndihmën shtetërore nga Qeveria dhe do të ishte e diskutueshme t'u jepej atyre ndihmë e dyfishtë shtetërore.

 "Nga ajo që e morëm sa i përket analizave, nuk e di nëse ekziston shembull i tillë jo vetëm në rajon dhe në vende të tjera që i njëjti investim të ketë dy apo tre lloje të ndihmës. Për një ndihmë – po, këtë e bëjnë të gjitha shtetet e botës, por të kesh dy ose tre lloje ndihme për një investim mendoj se do të ishte e diskutueshme. Prandaj, ato propozime dhe ato kërkesa duhet të shikohen me shumë kujdes nga investitorët strategjikë", porositi Bekteshi.

 Ai sqaroi se Ministria e Ekonomisë nuk ka bërë propozimin për investime strategjike, por ka kryer vetëm pjesën formale për t'i vënë ato në një seancë qeveritare.

 "Sipas mediave, del se Ministria e Ekonomisë e ka bërë propozimin. Nuk është ashtu. Në pjesën e Ligjit për investime strategjike, është krijuar Komision me anëtarë të caktuar dhe Ministria e Ekonomisë kryen vetëm pjesën formale për t'i bashkëngjitur në seance qeveritare një projekt marrëveshje të caktuar ose, në këtë rast, një projektligj ku shtojca e tyre është marrëveshja që keni parë dhe e cila tashmë është publikuar. Për disa nga ato investime strategjike, unë personalisht, së bashku me këshilltarët e mi, mendoj se disa gjëra duhet të ndryshohen ose të negociohen me palët e interesuara sepse ne, si Ministri e Ekonomisë, nuk ishim të përfshirë drejtpërdrejt në negociata", bëri të ditur Bekteshi.

 Për të tjerët, theksoi ai, mendoj se tashmë kemi analiza nga shumë institucione ndërkombëtare me reputacion që monitorohen dhe në atë pjesë të gjitha rekomandimet e tyre përfshihen në zgjidhjet ekzistuese ligjore dhe projekt-marrëveshjet që janë aneks i zgjidhjeve ligjore.

 "Për këtë arsye, të hënën ose të martën, si Ministri e Ekonomisë, do të kërkojmë një sqarim shtesë nga ekipi që u përfshi në negociata dhe ajo që pranohet nga Komisioni që është formuar nga Qeveria për një nga investimet që tashmë është në procedurë parlamentare. Nëse është e nevojshme, ne jemi të gatshëm si Ministri e Ekonomisë të kërkojmë zyrtarisht ligjërisht kthimin e zgjidhjeve të caktuara në procedurë qeveritare që do të negociohet nga fillimi", tha Bekteshi.

 Në rend dite të seancës së 140-të të Kuvendit janë vendosur Propozim-ligji për realizimin e projektit strategjik investues “Mitilineos”, impianti i kogjenerimit Shkup, në procedurë të shkurtuar, Propozim-ligji për zbatimin e Projektit strategjik investues “Solar Park Stipion” dhe Marrëveshja për projektin strategjik investues “Solar Park Stipion”, në procedurë të shkurtuar, Propozim-ligji për realizimin e projektit strategjike investues AIM GREEN TECH, në procedurë të shkurtuar dhe Propozim-ligji për zbatimin e projektit strategjik investues termocentrali diellor - Pehçevë, në procedurë të shkurtuar.

 Shoqata e Inxhinierëve të Republikës së Maqedonisë (INRM) para fillimit të seancës dorëzoi shkresë dhe i dërgoi mesazh elektronik secilit deputet në Kuvend individualisht, duke u kërkuar atyre që të mos mbështesin katër propozim-ligjet, siç thonë ata, të dëmshme për zbatimin e projekteve strategjike investuese energjetike, meqë ato shkelin sovranitetin energjetik të shtetit.

Megjithatë, propozim-ligjet tashmë kanë kaluar filtrin e parë në Kuvend me 58 vota "për" dhe 31 "kundër" dhe do të diskutohen në komisionet amë për çështjet ekonomike dhe ligjdhënëse pas çka do të miratohen me procedurë të shkurtuar 

Foto: Printskrin