Bruksel, 19 mars 2024 (MIA) - Këshilli i BE-së miratoi sot një Rregullore të re ligjore për të mbrojtur gazetarët dhe aktivistët e të drejtave të njeriut nga paditë tendencioze, me qëllim që t'i dekurajojë ata të shprehen për çështje me interes publik.

Siç njofton korrespondenti i MIA-s nga Brukseli, Rregullorja u ofron gazetarëve dhe mbrojtësve të të drejtave të njeriut siguri procedurale dhe masa për mbrojtje nga të ashtuquajturat. “Paditë strategjike kundër pjesëmarrjes publike” (SLAPP). Masat do të mbronin viktimat e mundshme SLAPP nga "kërkesat e dukshme të pabaza ose proceset gjyqësore tendencioze" në kontestet civile.

Individët, viktima të mundshme të këtyre padive, mund t'i kërkojnë Gjykatës që t'i hedh poshtë ato në "fazën më të hershme të mundshme nëse kërkesa është qartazi e pabazë". Nëse konstatohet se procedura është tendencioze, Gjykata mund të vendosë që shpenzimet e procedurës, duke përfshirë edhe ato për përfaqësimin juridik të viktimës së padisë, t'i bartë paditësi.

Me qëllim që të sigurohet se i akuzuari në mënyrë të pabazë do të dëmshpërblehet, Gjykata mund të urdhërojë paditësin që të sigurojë garanci financiare për të mbuluar shpenzimet e procedurës, si dhe për çdo dëm të pësuar nga i pandehuri.

Me Rregullore, gjykatat janë të obliguara me procedurë të përshpejtuar që të marrin vendim për hedhjen poshtë të parakohshëm të lëndës SLAPP dhe të garantojnë siguri financiare.

Me qëllim të dekurajimit të padive të tilla, gjyqtari mund të vendosë të vendosë gjoba ose masa të tjera të përshtatshme ndaj palës që e ka ngritur padinë SLAPP.

Nëse një person që jeton në BE akuzohet me një padi të tillë në një vend të tretë, anëtarët e Unionit janë të detyruar të mos e njohin një vendim të tillë dhe të refuzojnë kryerjen e tij, nëse është e qartë se ai është i pabazuar ose tendencioz.

Rregullorja kërkon që vendet anëtare të vendosin rregulla që do t'i lejojnë shoqatat, organizatat ose sindikatat të ofrojnë mbështetje për të pandehurit në një padi SLAPP, si dhe të ofrojnë të dhëna në procedurë.

Për të mbështetur viktimat e padive të tilla, vendet anëtare do të duhet të krijojnë një sistem me informacione mbi masat mbrojtëse procedurale dhe mjetet juridike në dispozicion të atyre që akuzohen pa bazë.

Rregullorja do të hyjë në fuqi në ditën e 20-të pas shpalljes në Gazetën Zyrtare të Bashkimit Evropian, pas së cilës vendet anëtare kanë dy vjet kohë për ta përfshirë atë në legjislacionin e tyre kombëtar. sa/

Foto: Arkivi i MIA-s