15 nëntor 2024 

Bashkimi Demokratik për Integrim (BDI) dënon fuqimisht fushatën në vazhdim të diskriminimit etnik dhe "pastrimit institucional" që po vihet në zbatim ndaj administratorëve shtetërorë dhe publikë, punonjësve të policisë dhe ata shëndetësorë si dhe shërbyesve civilë me përkatësi  shqiptare.

Nën maskën e një "patriotizmi" të rremë dhe të retorikës së "kthimit të Maqedonisë maqedonasve," po kryhet një përpjekje sistematike për të degraduar dhe margjinalizuar profesionistët që i kanë shërbyer këtij shteti me përkushtim dhe profesionalizëm të pakontestueshëm.

Punonjësit shqiptarë, të cilët kanë dëshmuar lojalitetin e tyre ndaj institucioneve dhe qytetarëve të këtij vendi, po degradohen dhe po largohen në mënyrë të padrejtë nga detyrat e tyre.

Kjo fushatë është një sinjal alarmues për një agjendë më të gjerë, që synon të përmbysë parimet e barazisë dhe harmonisë multietnike, të cilat janë themelet e Marrëveshjes së Ohrit.

Kjo përpjekje e orkestruar nuk është vetëm një fyerje ndaj shqiptarëve – është një sulm ndaj vetë strukturave të shtetit.

Degradimi i profesionistëve në polici, në sektorin e shëndetësisë dhe në institucionet e tjera publike dërgon një mesazh të rrezikshëm: se diskriminimi mund të institucionalizohet.

Ne i bëjmë thirrje qeverisë të ndalojë menjëherë këto praktika, të cilat jo vetëm që janë të padrejta, por minojnë edhe stabilitetin dhe kohezionin e vendit tonë. Gjithashtu, ne i bëjmë apel komunitetit ndërkombëtar të ndjekë nga afër këto zhvillime, pasi ato përfaqësojnë një shkelje të parimeve të demokracisë, të drejtave të njeriut dhe barazisë.

Për ata që po orkestrojnë këtë fushatë ndarjeje, ne pyesim: Çfarë mesazhi po përpiqeni t’i përcillni qytetarëve të këtij vendi? A është ky një mesazh që diversiteti është kërcënim, dhe jo forcë? BDI ka qenë gjithmonë dhe do të jetë zëri dhe mbrojtësi i barazisë, drejtësisë dhe unitetit. 

Ne nuk do të qëndrojmë të heshtur përballë përpjekjeve për të zhbërë progresin e arritur ndër vite.
Për shërbyesit publikë, policët, mjekët dhe administratorët që janë në shënjestër, dijeni këtë: Nuk jeni vetëm. BDI qëndron fuqishëm me ju, si gjithmonë. 

Ne do të sigurojmë që dinjiteti dhe të drejtat tuaja të mbrohen. Të gjithë duhet të kujtojmë se forca e këtij vendi qëndron në diversitetin dhe përkushtimin e përbashkët për të ndërtuar një të ardhme më të mirë për të gjithë qytetarët.

Diskriminimi dhe ndarja vetëm na dobësojnë. Është detyra jonë kolektive të rezistojmë ndaj këtyre forcave dhe të punojmë së bashku për një shtet dhe shoqëri ku mbizotërojnë barazia dhe respekti reciprok.

BDI

____________________________________________________________________________________________________________________________________________________________________________

MIA këto tekste i publikon në formën integrale dhe origjinale dhe nuk mban përgjegjësi për përmbajtjen e tyre dhe as për mangësitë eventuale drejtshkrimore apo gabimet e shtypit.