Shkup, 16 prill 2022 Bashkimi Demokratik për Integrim (BDI) ka qëndruar gjatë gjithë këtyre viteve të qeverisjes në përkrahje të avancimit të pozitës së mësimdhënësve dhe edukatoreve duke realizuar rritjen e vazhdueshme të pagave në arsim që sipas kalkulimeve statistikore nga viti 2017 e deri më tani janë rritur për rreth 21 %. Të njëjtën politikë progresive jemi të vendosur ta ndjekim në vazhdimësi, prandaj duke përcjellë rrethanat e fundit të grevës së punonjësve të arsimit shprehim qartësisht qëndrimin se rritje të pagave në arsim do të ketë dhe zgjidhjen e duhur për këtë do ta gjejmë përmes dialogut. E drejta e grevës është e garantuar me ligj, por duke pasur parasysh rëndësinë e madhe që ka mbarëvajtja e pandërprerë dhe cilësore procesit edukativo – arsimor për ardhmërinë e fëmijëve, Bashkimi Demokratik për Integrim apelon për konstruktivitet nga ana e SASHK-ut për ndërprerje të grevës, rifillim të mësimdhënies nëpër shkollat e vendit duke filluar që nga dita e hënë dhe më pas vazhdim intensiv të dialogut përmes së cilit padyshim se do të gjendjet zgjidhja e duhur. Çdo prolongim i mëtejshëm i rrjedhës normale të mësimdhënies shkon në dëm të nxënësve dhe ardhmërisë së tyre në rrugën e dijes, rrezikohet matura shtetërore si dhe dhënia e provimit profesional për pesëqind mësues, gjë të cilën nuk duhet ta lejojmë pas gjithë atyre sfidave që bashkërisht i tejkaluam me sukses në periudhën e pandemisë. BDI shpreh shqetësim për tentativat për rrëmbimin e protestës nga ana e partive politike opozitare dhe nxitjen e papërgjegjshme të krizës të cilën e ndjejnë të gjithë qytetarët. Si subjekt politik pjesë e Qeverisë, BDI garanton angazhim maksimal për realizimin e mëtejshëm të politikave të përmirësimit të standardit ekonomik të të gjithë qytetarëve me të njejtën qasje ashtu siç u rritën paga minimale dhe ajo mesatare. Bashkimi Demokratik për Integrim __________________________________________________________________________ MIA këto tekste i publikon në formën integrale dhe origjinale dhe nuk mban përgjegjësi për përmbajtjen e tyre e as për gabimet eventuale drejtshkrimore ose të shtypit