Shkup, 30 korrik 2024 (MIA) - Me vëmendje po e përcjellim procesin, Ministria nuk është organ hetues, por do të sigurohemi që askush të mos akuzohet në shtet pa pasur prova adekuate për këtë, tha ministri i Transformimit Digjital Stefan Andonovski në lidhje me akuzat nga Venezuela se “hakerët nga Maqedonia e Veriut” kanë kryer një sulm kibernetik në sistemin e transmetimit të të dhënave të zgjedhjeve në këtë shtet të Amerikës së Jugut.

I pyetur për koment në lidhje me akuzën e kryeprokurorit të Venezuelës se qytetarët tanë kanë kryer një sulm kibernetik në favor të opozitës dhe ndaj presidentit aktual Nikolas Maduro, Andonovski u përgjigj se “është fjala për një regjim socialist i cili prej vitesh ka shpërndarë shpesh informacione të pambështetura me prova dhe fajëson palët e interesuara dhe shtetet që nuk kanë asnjë përgjegjësi në raste të tilla”.

"Shpresoj që përveç komenteve që dolën në opinion dhe që i kemi vërejtur dhe po i ndjekim me kujdes, nga shteti, nga autoritetet në atë shtet, do të ketë dëshmi adekuate për përfshirjen e pretenduar të disa qytetarëve tanë apo institucionet nga shteti.Ne po e ndjekim me kujdes procesin. Ministria nuk është organ hetimor, por do të sigurohemi që askush të mos akuzohet në vend pa pasur prova adekuate për të dhe të mos përfshihemi në betejat e brendshme politike të një regjimi autoritar që ekziston prej vitesh në atë vend dhe qëndrimin e saj ndaj opozitës në atë vend", tha Andonovski, duke iu përgjigjur pyetjeve të gazetarëve pas takimit me grupin punues për krijimin e strategjisë kibernetike.

Lidhur me deklaratën e djeshme të zëvendëskryeministrit dhe ministër për Marrëdhënie Ndërmjet Bashkësive, Ivan Stoilkoviq, i cili në një intervistë televizive tha se kishte dorëzuar një raport në Drejtorinë e Krimeve Kibernetike në Ministrinë e Punëve të Brendshme për monitorim nga distanca të video-përgjimit në Ministri, të cilën e themeloi paraardhësi i tij Artan Grubi, Andonovski u përgjigj se ministri Stoilkoviq do t'i ndajë informacionet më hollësisht sot në seancën e Qeverisë dhe, tha ai, "do ta dimë se me çfarë po përballen në atë Ministri".

Stoilkoviq dje në “Vesti Plus” në TV Kanal 5 theksoi se pas një kontrolli në Ministri nuk është mundur të përcaktohet se kush është në krye e as kush e kontrollon video-mbikëqyrjen dhe se në raportin e dorëzuar nga kompania “Mak Alarm” pas inspektimit në Ministri është deklaruar se është mundësuar monitorimi në distancë në aparatet e regjistrimit. Andonovski theksoi se kjo është kundër të gjitha ligjeve në vend.

"E përshëndes angazhimin e zëvendëskryeministrit dhe përkushtimin me të cilin zgjidh problemet. Nuk kam detaje. Ne nuk jemi një organ hetimor për të ditur detajet e asaj kompanie apo aktivitetet e saj. Mund të them se kemi gjetur një sistem regjistrimi edhe në Ministrinë e Transformimit Digjital, por mund të konfirmoj se është në pronësi dhe kontrolluar nga Ministria dhe është shënuar siç duhet që zona e caktuar është duke u regjistruar, pra është në përputhje me të gjitha ligjet në Ministrinë time. Nuk kam ende informacion se çfarë po ndodh në institucionet e tjera. Ndoshta autoriteti më kompetent do të jetë Ministria e Punëve të Brendshme. Sot kemi një takim në ora 12, kështu që mendoj se ministri do t'i ndajë informacionet më në detaje dhe do të dimë se me çfarë po ballafaqohen në atë ministri", theksoi Andonovski. sa/

Foto: MIA