Shkup, 2 mars 2023 (MIA) - Në seancën e sotme të Komisionit Parlamentar për Politikë të Jashtme, ambasadorët e sapoemëruar të vendit për Slloveni, Goran Milevski dhe për Spanjë, Edmond Ademi, i prezantuan platformat për aktivitetin e tyre diplomatik.

Në prezantimin e tezave për veprimtarinë e tij, Goran Milevski theksoi se Republika e Maqedonisë së Veriut dhe Republika e Sllovenisë kanë marrëdhënie jashtëzakonisht të mira politike dypalëshe dhe bashkëpunim të frytshëm dhe të pasur në nivel lokal, në fushën e ekonomisë, arsimit, shëndetësisë, dhe kulturës. Sllovenia është vendi i parë që e njohu pavarësinë e vendit.Këtë vit do të shënohet jubileu - 30 vjet nga hapja e Ambasadës së vendit tonë në Lubjanë, e cila ishte ambasada e parë e hapur jashtë vendit më 7 qershor 1993.

“Kemi çfarë të mësojmë nga Sllovenia sepse ajo është anëtare e BE-së dhe NATO-s që nga viti 2004, dhe në vitin 2007 është pjesë e Eurozonës si dhe e zonës Shengen. Rruga që ata morën mund të jetë udhërrëfyesi ynë se si të bëhemi pjesë e BE-së, por edhe të përmirësojmë standardin e qytetarëve. Sllovenia është lobisti më i madh i Maqedonisë për anëtarësimin në NATO dhe BE. Sllovenia është motori që tërheq të gjithë Ballkanin Perëndimor në BE dhe partneri ynë strategjik më i rëndësishëm atje”, tha Milevski.

Ai shtoi se për dallim nga marrëdhëniet e jashtëzakonshme politike, marrëdhëniet ekonomike nuk e ndjekin atë dinamikë dhe janë në mesataren e shkëmbimit tregtar, me deficit nga pala maqedonase. Është pozitive që ky deficit po zvogëlohet nga viti në vit dhe viti i kaluar tregon se eksportet maqedonase do të kalojnë për herë të parë 100 milionë euro me një shkëmbim të ndërsjellë prej 235 milionë euro, me deficitin më të vogël nga ana jonë dhe një diferencë prej 34 milionë eurosh.

“Detyra jonë si Ambasadë është që të bëjmë përpjekje që sa më shumë të rrisim eksportet në Slloveni dhe paralelisht të rrisim investimet e Sllovenisë në Maqedoninë e Veriut”, tha ambasadori Milevski.

Ai përmendi se Sllovenia nga viti 2003 deri në vitin 2021 ka investuar në vendin tonë 554 milionë euro, ndërsa vetëm vitin e kaluar 11 milionë euro, duke e bërë investitorin e pestë më të madh në vend. Në 40 kompani që punojnë me ne ka 2500 persona të punësuar. Për krahasim, investimet nga vendi në Slloveni për 10 vitet e fundit arrijnë në 60 milionë euro. Sipas strukturës eksportohen kryesisht produktet farmaceutike dhe medikamentet dhe zhgënjyes është fakti që deficiti është në rritje në raport me eksportin e produkteve bujqësore, të cilat sipas tij duhet të reduktohen.

Milevski njoftoi se do të angazhohet për rithemelimin e linjës ajrore Shkup-Ljubljanë, e cila u anulua për shkak të pandemisë KOVID-19 dhe që do të kontribuojë dukshëm në përmirësimin e marrëdhënieve ekonomike, tërheqjen e investimeve sllovene dhe turizmit, për të cilat ai do të punojë si ambasador. Ai përmendi edhe rolin e diasporës maqedonase në Slloveni, e cila numëron 20,000 njerëz, e cila është politikisht aktive dhe tashmë ka një eurodeputet nga Sllovenia me origjinë maqedonase, si dhe një ministër në qeverinë e re të kryeministrit Robert Golob, si dhe këshilltarë në dy bashki. Në Slloveni studiojnë edhe rreth 2000 qytetarë tanë, të cilët kanë të njëjtat të drejta si studentët vendas.

E pyetur deputetja nga PRSD-ja, Sonja Mirakovska, ajo theksoi se tashmë ka marrëveshje ndërmjet institucioneve dhe ministrive për bashkëpunim dhe shfrytëzimin e ekspertizës dhe përvojës sllovene në lidhje me zhvillimin dhe kapacitetet e administratës në rrugën drejt BE-së në kontekstin e negociatave të anëtarësimit dhe ajo do të punojë për të përdorur lidhjet politike për të ndihmuar ministritë tona të linjës në këtë drejtim.

Kryetari i Komisionit, Antonio Milloshoski, theksoi se Milevski ka një agjendë ambicioze, por me vetëm një diplomat dhe një sekretar në Ambasadën në Lubjanë, do të jetë shumë e vështirë të realizohet.

“Rekomandimi im është që Ministria e Punëve të Jashtme të zvogëlojë sadopak aktivitetet e saj për promovim dhe PR të ministrit dhe të rrisë pak më shumë fondet për diplomatët në ambasadat ku Maqedonia ka miq, por edhe shanse të mëdha për promovimin e interesave të saj dhe për bashkëpunim në më shumë fusha”, tha Milloshoski.

Ambasadori i sapoemëruar në Mbretërinë e Spanjës, Edmond Ademi, në prezantimin e tij nënvizoi se Spanja, e cila është anëtare e NATO-s dhe BE-së, në vazhdimësi mbështet integrimin tonë euroatlantik dhe në gjysmën e dytë të vitit do të kryesojë BE-në për herë të pestë. Ai theksoi se tashmë janë shpallur konturet dhe drejtimet kryesore në të cilat do të fokusohet presidenca spanjolle e BE-së, e kjo është një Evropë më e integruar, më fleksibël me një efekt më të madh global.

“Përsa i përket Ballkanit Perëndimor, Spanja synon të ruajë perspektivën e saj evropiane dhe të konsolidojë dhe promovojë marrëdhëniet dypalëshe me vendet e rajonit, duke mbështetur përparimin e tyre drejt anëtarësimit në BE. Spanja mbështet vazhdimisht integrimin tonë në BE dhe mbron përparimin tonë të përshpejtuar në rrugën evropiane. Ai përfaqëson qëndrimin se zbatimi i përshpejtuar, efektiv dhe efikas i reformave dhe përmbushja e kritereve të BE-së do të ketë përfitime për përmirësimin e standardit jetësor të vetë qytetarëve, por edhe për një zhvillim më efikas të proceseve”, tha Ademi.

Ai theksoi se aktivitetin e tij do ta përqendrojë në promovimin e interesave tona, e veçanërisht në tërheqjen e investimeve të huaja direkte dhe zhvillimin e bashkëpunimit kulturor, si dhe në futjen e linjave ajrore direkte nga Shkupi në Madrid, Barcelonë... se është rënë dakord me MPJ-në që në prag të presidencës spanjolle të forcohen ambientet e Ambasadës me disa diplomatë, për të shfrytëzuar këtë presidencë.

Sipas Milloshoskit, numri i diplomatëve në ambasadë duhet të forcohet, jo vetëm në një periudhë gjashtëmujore, por edhe në planin afatgjatë.

Rexhep Demiri, i cili është emëruar ambasador në Zvicër, nuk ka marrë pjesë në seancë për arsye shëndetësore. Ai do t'i mbrojë tezat në vazhdim të seancës, e cila do të caktohet si shtesë.

Me paraqitjen e tezave në komisionin parlamentar të vendit, ambasadorët e emëruar kalojnë filtrin e fundit përpara nisjes për në misionin diplomatik.

Foto: MIA arkiv