Shkup, 27 mars 2024 (MIA) - Kompania "Alkaloid" SHA Shkup sot lëshoi në përdorim kapacitete të reja për prodhimin e formave të forta farmaceutike, me sipërfaqe prej 6.200 metra katrorë, në vlerë prej 19,4 milionë euro.

Me njësinë e re tekniko-teknologjike, vëllimi i prodhimit dyfishohet, kështu që në vend të kapacitetit të mëparshëm prej dy miliardë tableta në vit, kapaciteti aktual i parashikuar i prodhimit është më shumë se katër miliardë tableta në vit.

Për ndërtimin e objektit, i cili ka filluar në prill të vitit 2021, janë angazhuar 30 kompani vendore dhe 16 të huaja, ndërsa punimet ndërtimore dhe mobilimi janë bërë nën menaxhimin e shërbimeve profesionale të “Alkaloid” SHA Shkup.

Ambientet janë projektuar në përputhje me normat strikte për praktikën e mirë të prodhimit, dhe të gjitha proceset janë plotësisht të integruara dhe digjitalizuara, me gjenerim automatik të të gjitha të dhënave nga kontrollet e procesit.

Nga SHA “Alkaloid” theksojnë se ky është një nga projektet e tyre investuese më të mëdha në dy dekadat e fundit. Në vitin 2005, kompania kishte plasmanet prej 53,1 milionë euro, ndërsa në vitin 2023 kishte plasmanet e konsoliduara prej 268,3 milionë euro. Si rezultat i kësaj rritjeje të vazhdueshme pesëfishuar, gjatë 15 viteve të fundit janë realizuar investime në vlerë mbi 220 milionë euro. Produktet farmaceutike të "Alkaloid" janë të pranishme në tregjet e më shumë se 40 vendeve të botës. ls/

Foto: SHA Alkaloid