Shkup, 25 mars 2024 (MIA) – Për të dytin vit radhazi, sot dhe nesër, mbahet ngjarja e biznesit SUBEX, qëllimi i të cilit është lidhja e kompanive furnizuese vendore me kompanitë blerëse nga Gjermania, BE-ja dhe rajoni, kumtojnë nga AHK Maqedonia e Veriut.

Në këtë ngjarje, siç është theksuar në kumtesën, u theksua rëndësia e forcimit të lidhjeve ekonomike në një kohë kur Evropa, por edhe bota po përballet me sfida të mëdha, të cilat kanë pasoja të forta edhe për ekonominë.

Njëkohësisht u ndanë certifikata edhe për gjeneratën e dytë të studentëve që përfunduan arsimin dual sipas standardeve gjermane.

Ministri i Arsimit dhe Shkencës Jeton Shaqiri ka theksuar se numri i nxënësve të regjistruar në arsimin e mesëm profesional është në rritje.

"Mund të them me krenari se me angazhimin e jashtëzakonshëm disa vjeçar të Ministrisë së Arsimit dhe Shkencës së bashku me partnerët tanë, kemi ndryshuar perceptimin për arsimin profesional dhe kemi rritur atraktivitetin e tij. Këtë e tregon rritja e vazhdueshme e numrit të nxënësve të regjistruar në arsimin e mesëm profesional. Në vitin akademik 2023/2024 në shkollat ​​e mesme profesionale janë regjistruar mbi 43 mijë nxënës. Nëse deri vonë gjimnazet ishin zgjedhja e parë e nxënësve të klasës së nëntë, tashmë tabloja ka ndryshuar tërësisht. Këtë vit shkollor 67,3 për qind e nxënësve kanë zgjedhur arsimin profesional, krahasuar me gjimnazin", ka thënë Shaqiri.

Ekipi i AHK Maqedonia e Veriut theksoi se në vitet e kaluara investitorët vendas dhe gjermanë janë përkushtuar gjithnjë e më shumë në temën e sigurimit të kuadrove profesionale.

"Dje folëm për faktorët që aktualisht e bëjnë rajonin e Ballkanit kaq tërheqës për Gjermaninë dhe ekonominë evropiane, në të njëjtën kohë investitorët gjermanë në Maqedoninë e Veriut me më shumë se 20 mijë vende pune janë më të mëdhenjtë dhe në të njëjtën kohë vlerësohen si një nga punëdhënësit më tërheqës. Besoj se kur të rinjtë marrin një vendim për zgjedhjen e profesionit të ardhshëm, përveç talenteve dhe afiniteteve të tyre personale, duhet të kenë parasysh edhe kërkesën për personel që i nevojitet tregut të punës. Në panairin e sotëm të punësimit dhe karrierës do të prezantohen më shumë se 30 kompani, të cilët do të kenë mundësinë në dialog të drejtpërdrejtë me nxënësit e shkollave, studentët dhe bursistët të diskutojnë për nevojat e profileve në kompanitë e tyre", deklarou Antje Vandelt, drejtoreshë e AHK Maqedonia e Veriut. Shqipëria dhe Kosova.

AHK Maqedonia e Veriut e zbaton programin për arsim të dyfishtë profesional në gjuhën gjermane për gjashtë vite me radhë. Programi zbatohet në shtatë shkolla të mesme profesionale dhe në 15 kompani partnere. ls/

Foto: AHK Maqedonia e Veriut