Shkup, 21 korrik 2023 (MIA) - Deputeti dhe koordinatori i grupit të deputetëve të BDI-së, Arbër Ademi, ka thënë sot se formalisht kanë edhe 15 deputetë pasi Izet Mexhiti dhe Merita Koxhaxhiku nuk kanë njoftuar se po largohen nga ky grup parlamentar.

"Grupi ynë parlamentar kishte 15 deputetë, por formalisht ka ende, sepse unë si koordinator i grupit parlamentar ende nuk kam një vendim formal për t'u shkëputur nga grupi parlamentar. Deri më tani nuk kam asnjë informacion se grupi parlamentar ka rënë apo është rritur", tha Ademi për edicionin veror të Klik Plus në Tv 21.

Për largimin e Izet Mexhitit nga partia dhe paralajmërimin për formimin e një lëvizjeje të re politike, Ademi pohon se e kanë marrë vesh nga mediat. Ademi, siç tha ai, i vjen keq për këtë vendim, por sipas tij, ai është trajtuar mirë nga BDI dhe Ahmeti.

"Ne jemi informuar nga mediat për angazhimin e ri politik, në këtë rast dua të theksoj se janë persona të rëndësishëm që kanë mbajtur pozita të larta politike dhe partiake, janë trajtuar shumë mirë në BDI”, tha koordinatori i grupit parlamentar të BDI-së.

Si subjekt politik, BDI, siç tha ai, nuk ka frikë nga lëvizja politike e Izet Mexhitit.

"Të them të drejtën, jo, sepse është një organizatë politike e mirëorganizuar, e themeluar, e cila ka kaluar nëpër procese të ngjashme jo një herë, por disa herë”, tha Ademi.

Sipas tij, Bashkimi Demokratik për Integrim është në nivelin më të lartë sa i përket besueshmërisë në opinionin publik dhe kjo falë vizionit të Ali Ahmetit, i cili e ka bërë BDI-në një parti të qëndrueshme për 22 vjet.

Ademi pretendon se arrestimi i Ismet Gurit nuk ka lidhje me zhvillimet politike dhe se Ali Ahmeti nuk futet në “kurthe”.

Për ndryshimin e Kushtetutës, ai thotë se nuk kanë biseduar individualisht me deputetët e opozitës, por se nuk është mirë të kushtëzohet. sa/

Foto: TV21